政情：中大檸檬批或消失 何啟明憶美味名物

何啟明話Med Can嘅檸檬批味道酸甜，批底非常脆口，夏天享用尤其滋味，然而每日嘅發售數量都好有限，可謂向隅者眾。加上佢就讀新亞書院，距離醫學院餐廳有一段路程，因此品嘗到檸檬批嘅機會唔係太多。反而新亞飯堂嘅記憶就最深刻，因為當日嘅女朋友，即係今日嘅太太，同佢喺新亞飯堂歎下午茶啊。何啟明話新亞飯堂嘅雞髀同火腿卷，亦都係令人回味無窮嘅名物，但可惜如今俱成過去。

雖然昔日嘅美味逐一消失，但佢話中大仲有一樣名物依然存在，就係崇基飯堂嘅「頹飯」嘞！佢話鍾情「頹飯」嘅原因，就係區區10蚊一碟飯，就有齊腸仔同火腿，仲可以淋豉油汁添，咁嘅價錢邊度搵呀？況且啖啖肉唔使𦧲骨，啱晒佢咁話。