政情：M+董事局主席換人 傳陳智思接任

任期將告屆滿嘅羅仲榮，由15年前就已經出任西九龍文娛藝術區核心文化藝術設施諮詢委員會轄下博物館小組召集人，並於2016年起出任M+董事局主席，多年來見證西九項目由概念設計、建造、完工同投入營運，曾形容如今嘅成果得來不易。至於曾負笈美國修讀藝術嘅陳智思，則於2016年起擔任西九文化區董事局成員，並於社會不同層面參與推動文化同藝術發展。

據知嚟緊M+董事局將會有兩方面新變化，由於M+開始進入新里程，由建築、籌備、轉而進入長期營運階段，喺經營模式方面，將引進更多新思維，以更可持續嘅方式，建設令香港引以為傲嘅國際級當代視覺文化博物館。另外亦會加強面向本地公眾，做多啲普及教育工作，培養大眾對博物館嘅支持同熱愛。