政情：幫襯新髮型屋 蕭偉強大呼中伏

蕭偉強話佢早前都試過快剪店，儘管係又快又平，但感覺似足剪羊毛，髮型雖大致保持，但佢就嫌唔夠細緻，於是日前佢就試吓屋企附近，一間睇落都幾時尚嘅髮型屋。

整潔寬敞嘅空間，又有供客人放置外衣同背囊嘅儲物櫃，加上洗頭姐姐專業同用心嘅服務，蕭偉強不期然就對呢間初次光顧嘅髮型屋產生好感。當問佢要揀Top stylist（頂級造型師）還是Senior top stylist（資深頂級造型師）嘅時候，蕭認為前者都應該足以勝任。殊不知所謂Top stylist竟然係一位小妹妹，於是吩咐對方依原來髮型嚟修短，同埋記得額前劉海留番長啲。佢見小妹妹理髮手法純熟，以為可以放鬆戒備，但當佢發現唔多對路嘅時候，已經不可挽回啦！

蕭偉強又話，當佢一踏入家門，夫人同囡囡都笑到收唔到聲，可見今次個髮型有幾出位。佢又若有所悟咁話，自己作為阿伯，相信去上海理髮店會比較穩陣！