政情：抗疫歌領唱 管牧注入正能量

話說呢首打氣歌曲《互勉同行》，旋律係來自許冠傑30多年前嘅作品《同舟共濟》，並略為修改原曲歌詞，以貼合當下嘅社會狀況，鼓勵市民做好本分，齊心抗疫。而負責領唱嘅管牧率先唱第一句歌詞「這世界仍在困難時」之後，跟住就輪到其他人一句接一句咁接續唱落去，直至後段一齊合唱副歌，呼籲港人「但願患難消失之後，共同度過，戰勝可怕」。

社福界議員狄志遠亦有參與今次嘅錄唱。佢話因應疫情，參與獻唱者全部都係按時段個別到錄音室錄音，然後透過後期製作將各人嘅歌唱片段連貫埋一齊。加上錄音過程好嚴謹，連佢自己都NG咗幾次，結果一首不足4分鐘嘅歌曲，眾人嘅錄音時間加加埋埋就用咗兩日。