政情：免筋骨生銹 江玉歡踩住單車開會

其實踩住單車機開工，係江玉歡喺疫情下嘅應對措施。佢話疫情肆虐，由農曆年初開始所有大大小小嘅會議都改為網上舉行，就連落區機會都少咗，運動量難免大減。唔想坐得多筋骨「生銹」，於是佢喺上個月買咗兩部單車機，一部放喺議員辦公室，另一部就擺喺佢平時返工嘅律師事務所，咁就算開視像會議，做運動亦都可以同時進行。

之不過，踩住單車機開視像會議，會唔會唔夠專注呢？佢話若果輪到自己發言，就會停止踩單車機。佢又話減少外出，無疑可減低染疫機會，但成日匿喺屋企嘅弊處，係好容易會食得過多，運動做得太少，長遠而言不利健康，所以喺辦公室添置單車機之餘，佢喺屋企亦有一部小型跑步機。做運動要做得自在，當然係疫情盡快退卻，大家恢復戶外活動就最好啦！