政情：話地震冇得預警 天文台遭打臉

話說尋日凌晨，台灣花蓮近海發生地震，當地民眾瞬間驚醒之餘，亦有好多人話警報發出後約10秒先至感到建築物搖晃嘅震感，大讚氣象局嘅警報比地震仲要快！對比上周香港天文台要喺地震後先至發出通報，台港兩地嘅預測地震水平可謂高下立見。

天文台前台長岑智明，上周反駁市民對天文台嘅質疑，就指破壞力強嘅地震波（S-wave）速度較縱波（P-wave）稍慢，因此某啲國家嘅氣象部門係可以同地震波鬥快，提供地震前10秒嘅預警。既然岑智明都講得出人家點樣提供地震預警，點解香港天文台唔去參考做法呢？雖則話預警時間較為短促，但不時面對地震嘅台灣網民就話「提早10秒給推，很夠時間躲了」。