政情：華員會促抗疫為先 公僕調薪放一邊

華員會喺信中提到，中央全力支持港府抗疫，如果薪酬趨勢調查委員會唔中止2022年嘅薪酬趨勢調查、薪諮會聯合秘書處嘅公務人員繼續以調查工作為首嘅話，會被質疑政府部門同相關委員會各自為政。會方同時認為私營公司業務受疫情嚴重扭曲，公私營企業喺疫情肆虐下處於非常時期，甚至有公司參與調查後冇耐就結業，認為薪酬趨勢調查指標冇參考價值，勉強進行只會引起嚴重爭議同埋分化。

華員會會長利葵燕進一步解釋，話首先公務員應該負起社會責任，並唔可以話疫情間做多咗嘢就要加人工；另一方面，即使有私營機構喺疫情期間仍能保持業績，然而亦有好多機構嘅營業額係插水式下跌，無論點樣都冇參考價值。佢又話倘若到最後公務員要減人工，恐怕會惹來私營機構嘅倣效，對廣大嘅打工仔而言並非好事，認為公務員凍薪先係平衡做法。

另外，利葵燕又話公務員薪酬趨勢調查只係公務員調薪6大因素之一，政府喺沙士期間都曾經定下「033」協議，即2003年凍薪，其後兩年減薪3個百分點，當時亦冇進行公務員薪酬趨勢調查。所以政府依家都可以參考其他5大因素，即係香港經濟狀況、生活費用嘅變動、政府財政狀況、職方對薪酬調整嘅要求、公務員士氣，繼而決定係咪凍薪咁話。