政情：住家飯食肥咗 梁宏正期待出街開餐

梁宏正話呢排成日喺屋企食嘢，之但係「住家飯」食得多唔等如健康，事關喺屋企食嘢多咗，又冇乜機會做運動，難免會肥咗少少咁囉。雖然係肥咗少少，不過就多咗時間同屋企兩個小朋友一齊，形容係不幸之中嘅一種感恩。佢又話小朋友依家冇得返學上課，全家都盡量小心避免中招，而家中外傭都好自律，就算寄嘢返鄉下，都盡量唔喺街上流連，急急腳返屋企。

自嘲最叻淨係煮公仔麵嘅梁宏正，話自己喺屋企食飯並無落廚，反而叫人落廚就有。對於下個月開始逐步放寬晚巿堂食，梁話相當期待，冀快啲幫襯吓食肆，振興經濟，但都要視乎屆時嘅情況，希望疫情可以快啲好轉啦。