政情：上載「快測等兩個鐘睇結果」 急刪貼文 陸頌雄：按說明書最穩陣

其實陸頌雄嘅社交專頁，曾上載「做快速測試嘅朋友，快速測試棒建議放多一兩個鐘，有人等咗個半鐘先見到條線」嘅貼文。由於內容同大眾嘅認知落差太大，好快就有網民留言質問，點解唔係依照說明書等15分鐘呢？又質疑唔按說明書嘅做法，所得出測試結果係咪可靠，至於陸頌雄嘅「回應」，就係立即刪除貼文。

及後陸頌雄解釋，話有位幫佢管理社交平台嘅同事，遇到一位朋友做快測，等咗個半鐘先見到條線，於是就以朋友嘅親身經驗發貼文嘞！佢話睇完貼文之後都覺得唔妥，所以就快快刪咗，仲呼籲大家，按說明書指示做快測先至最穩陣。