政情：議辦曾借光城者陳運通在英隊啤

5月國安處助查 7月辭任區議員

流亡英國嘅前區議員愈嚟愈多，當中更有人遭港警列入通緝名單！佢哋喺英國不時都有聚會，其中喺幾個前沙田區政成員、前沙田區議員嘅合照中，竟然發現一張新面孔。邊個？就係沙田前區議員陳運通，佢曾借出議員辦事處畀學生組織「光城者」開記者會，喺去年5月應警務處國家安全處嘅要求去警署助查。唔知佢今次去英國係同朋友短敍抑或長住呢？

沙田前區議員丁仕元同曾杰等人，都係已解散嘅沙田區政成員，亦已遠走英國。而丁仕元嘅Facebook（Fb）尋日貼文同上載咗一張相，係佢哋喺諾定咸相聚，而陳運通都係座上客，佢哋當時喺度飲緊啤酒，陳運通同曾杰都豎起拇指，戴住Cap帽嘅陳運通面前嗰杯黑啤較為搶眼。

與丁仕元曾杰合照

從呢張相所見，大家都笑容滿臉，丁仕元仲貼文話「沙田兄弟！諾定咸相聚，曾杰、陳運通」。

陳運通喺舊年7月辭去區議員職務後，形容自己放緊「悠長假期」，而無所事事嘅後果就係體重暴增，擔心再肥落去嘅話，恐怕遲啲連腳趾都望唔到，所以佢決定做運動減肥。但依家就似乎打回原形嘞！事關佢嘅前同事，都係沙田前區議員黎梓恩喺網上留言，話「通爺圓咗」，明顯係話佢發咗福。

喺陳運通辭職之前個多月，即係去年5月中旬，佢曾應警務處國家安全處嘅要求，就去年2月將其區議員辦事處借畀學生組織「光城者」，需往田心警署協助調查。

佢同警方經過約3小時嘅會面後離開警署，並無遭到拘控，佢重申當日借出場地只係予人方便，強調只係助查。

冇交代會唔會返港

當時警方回覆本報查詢，話警方喺5月上旬以「顛覆國家政權」罪拘捕4男一女。經調查後，警務處國家安全處人員持法庭手令進入一名沙田區議員嘅辦公室進行搜證，行動中暫未有人被捕。

到底陳運通係乜嘢原因離港赴英，佢有冇打算幾時返港？睇番佢嘅Fb更新訊息去到3月17日，上載嘅都係一啲地區訊息同防疫資料，並冇交代佢已經去咗英國！