政情：獄中打波興致起 林朗彥入坑NBA

林朗彥喺中學時代，對職業籃球嘅印象就係球員核爆咁大力「鋤樽」，又或者突破防守得分、入波之後就瞪大隻眼向對手投以怒目，認為呢啲打籃球嘅舉動並唔係佢杯茶。佢又話以前對NBA嘅認識，只係效力於洛杉磯湖人嘅高比拜仁、効力邁亞密熱火時代嘅勒邦占士，完全唔知道球員交易頻繁嘅現象，仲誤以為傳奇籃球名將米高佐敦係過咗身嘅人物添！

之不過，因監獄裏面部電視逢星期六有波睇，於是籃球就成為林朗彥在囚期間所發掘嘅興趣，後來仲持續半年，每3日必打一次籃球嘅習慣。佢話出獄之後，對NBA更有進一步嘅認識，深感遠距投射、傳波走位等動作都可以咁有爽度，而入球嘅慶祝方式，竟然可以係跳騎呢舞。佢又形容依家睇NBA簡直係「入坑」咁話。