政情：狂咳得人驚 陳肇始唔認病

由特首率領嘅疫情記者會於本月9日開始，除咗星期二因行政會議暫停，一星期6天舉行，而尋日有3位官員出席，當中包括陳肇始。但無論邊位官員講嘢嘅時候，都隱約聽到有人咳。直到有記者喺問答環節向陳肇始提問，話「想問吓陳局長，聽到有幾聲咳，想關心吓你嘅身體狀況」。之不過，陳就淨係答咗其他有關疫情嘅問題，冇回應自己係咪唔舒服喇。

最近不斷有政府高層嘅秘書、司機確診，惟至今都未有局長受到感染。其中陳肇始嘅秘書都喺本月初確診，當時陳話每日有進行快速測試，但謹慎起見都有作專業拭子採樣檢測，結果同為冇染疫。

事實上，陳肇始嘅身體狀況時常引起外界關注，佢加入問責班子後已至少3次手臂受傷變「獨臂」。2015年10月，時任食衞局副局長嘅陳肇始，就喺做健身時失平衡跌倒，令右手虎口位舟骨骨裂，要用護腕固定右手，並作為期6周嘅治療；2019年3月，陳肇始出席一個公開活動嘅途中，唔小心喺公眾地方嘅升降機中跣親，之後就去咗瑪麗醫院醫治，雖然有輕微骨裂，並觸及手腕舊患，但因為冇乜大礙，所以都唔使留院，打完石膏就可以返屋企休息；去年5月底，陳又意外跌倒導致左手受傷。

去年5月，陳肇始出席醫院管理局研討大會期間，一度瞌眼瞓「釣魚」差唔多半個鐘，完全係無視在場嘉賓嘅分享，令人懷疑佢係咪身體不適「中咗招」，感染新冠病毒。