政情：打第三針半年後 葉劉抗體大跌

葉劉本來打咗兩針科興疫苗，舊年同幾個行會成員應邀參加接種第3針新冠疫苗測試計劃。而佢喺舊年9月16日接種復必泰疫苗，日前佢再到醫院接受最後一次抗體測試。

溝針後，佢嘅抗體水平由不足100爆升至約兩萬，而喺舊年12月中已經下滑。咁今次結果係點？佢話一如所料，根據新型冠狀病毒疫苗注射後血清中同抗體報告，體內抗體數下跌，由舊年12月中嘅10,891.5下跌至今嘅6,248.8，但呢個數仍然屬於唔錯嘅水平，仲話睇嚟「溝針」嘅效果不俗，仲話較早前佢嘅司機確診，但佢並冇受到感染，相信係因為佢打咗3針疫苗嘅幫助，保護咗佢。

佢話完成咗呢臨床測試後，會詢問醫生專業意見，係咪有需要再打第4針。可能預計抗體會繼續下跌，但疫情又未受控，想保護自己多啲喇，不過咁搞法，都唔知要打幾多針啦。