政情：放風望高牆 鄒幸彤自比井底蛙

鄒幸彤話天台係放風嘅場地，由於圍起高牆，只喺兩米以上嘅位置透過鐵絲網睇到外面嘅風光，某程度上置身其中嘅囚徒恍如井底之蛙，只能仰首高望，矚目之處就係山頂，好容易產生喺崇山峻嶺嘅錯覺。佢又有所體悟咁話，近看樹頂、遠眺山峰，會想像到泰山迎客松嘅畫面，但佢話如果睇到山尖就以為自己企得好高，其實只係幻覺，所以做人唔可以堅離地。

另外，佢話雖然冇鐘錶，但知道放風時間得一個鐘，然而冇辦法睇時間嘅情況下跑圈，到底距離目標仲有幾遠實在難以掌握，所以後來就改為數圈，而最新紀錄係100個圈！而呢個跑圈數字，更加反映放風場地有幾細咁話。