政情：單獨囚禁一整年劉頴匡快測中招

懲教多管齊下監獄遏疫擴散

多個懲教院所近日爆發疫情，累計已逾千名在囚人士及人員染疫。前年參與民主派「35+」初選，涉嫌違反《港區國安法》而被還押喺荔枝角收押所嘅社運人士劉頴匡，佢前日做快速測試時，亦證實染疫，同時有感冒症狀。懲教署發言人表示，署方唔會透露任何在囚人士嘅個人資料。

有感冒症狀獲調走隔離

替劉頴匡管理社交平台嘅友人，尋日喺Facebook貼文公布劉確診嘅消息，指收到懲教福利官電話，劉頴匡前日喺快速測試中發現感染Omicron，但強調劉「無乜事，係少少感冒症狀」，已獲安排調去隔離嘅地方，叫大家不用擔心。該貼文又指劉已單獨囚禁一整年，加上懲教實施鎖倉成個幾月，唔明白點解咁都可以中招。

院所全面檢測鎖倉運作

其實懲教署已經因應疫情而作出多項緊急措施。鑑於公立醫院唔收確診犯人，署方只能自行處理，已設法避免疫情喺監獄擴散，並早在農曆新年假期開始添置大量快速測試包，為同事及在囚人士進行全面檢測，並將確診人士及密切接觸群組即時隔離及治療；又調動所有可動用嘅人力資源上前線工作，當中包括職員訓練院、更生事務組、總部人員等，並安排前線人員組成特別組別（Dirty Team），執行管理高感染風險嘅隔離設施。

為減少院所內嘅人流及接觸，署方由上月18日起於各院所推行鎖倉運作模式，而3月7日至20日停止所有探訪，包括家屬探訪及公務探訪。

而正在服刑嘅民主派人士，包括支聯會主席李卓人、前副主席何俊仁，早前經測試後亦顯示中招。