政情：陳百里「送外賣」 全套裝備上身

陳百里尋日喺Facebook貼文，話佢返咗去坪石邨。事關佢未加入「熱廚房」之前係觀塘區坪石選區嘅區議員，所以咪係返「娘家」囉！其實，佢耐唔中都有返去搵番啲舊街坊傾下偈嘅，但係今次就唔同嘞，着到全副武裝咁喎。

貼文中陳指因為日前坪石邨被驗出污水監測帶有病毒，自稱係前「保長」嘅佢就着晒防護裝備咁上樓，挨家挨戶派物資，所以咪話佢做「步兵」囉！

老實講，依家好多確診咗嘅市民要家居隔離，但政府支援工作滯後，求助熱線打極都唔通，若果冇親友同社工幫手送藥同食物，真係唔知點捱落去。陳百里作為政府一員，當然唔可以懶懶閒喇，好似話佢呢排都有參與義工活動，做車手幫手送抗疫物資。