政情：政府支援唔多妥 隔離市民捱苦果

Alice尋日接受電台節目訪問，其中分享佢切身染疫嘅經歷。Alice同佢嘅家人喺上月下旬中招，佢估計源頭係佢爸爸嚟探訪孫女時，傳染咗畀其他家人。Alice上月23日快速檢測初步確診，其後核酸檢測嘅結果都顯示染疫，並出現病徵。不過，自從佢向政府呈報至今，足足有17日，都未有衞生署嘅人員聯絡過佢，更加唔好講有咩支援啦。而Alice嘅爸爸就喺遞交深喉唾液樣本後第9日先至收到確診報告，再過多兩日先收到政府嘅電話，而佢爸爸當時已經好番喇！

Alice嘅情況絕對唔係個別個案，同樣確診後無人理嘅市民比比皆是。佢話收到唔少市民反映，市民全家染疫，但失去支援，為咗購買必需品，就算染疫都被迫出門，加上政府嘅支援熱線長期打唔通，所以佢完全明白市民會有幾咁徬徨無助。

有見及此，佢促請政府盡快動員各界力量，因為就算政府話物資有幾充足都好，都要有人手幫手派發㗎嘛。講起人手，佢又話特區政府從內地招聘人手來港抗疫嘅過程唔係好順利，因為約1,000個名額得10幾人應徵，認為特區政府嘅招聘方法明顯唔可行，應該向中央要求派照顧員來港協助醫護及院舍照顧等工作。

至於確診者嘅指定診所方面，佢建議醫管局要增加名額同增設長者籌，確保每區嘅診所有足夠名額，否則好多患者會錯過求醫嘅最佳時機。佢話現時社區疫苗接種中心，每日都有好多確診長者前來，以為打針係染疫後嘅治療方法，佢認為政府可以協助轉介呢啲患者去指定診所求醫先囉！而對於醫管局近日引入兩款新冠口服藥物，佢話需要喺發病5日內服用先會有最佳治療效果，如果患者遲遲未獲得診治機會，亦都會減低藥物成效喎。