政情：幫社署招工何啟明公開私人號碼

早前社交平台流傳一段來自勞工及福利局副局長何啟明嘅錄音，指有機構需要急聘300名本地護理員，月薪介乎3.8萬元至4.7萬元，可提供入職培訓，而且沒有門檻，呼籲有意者聯絡。而最新何啟明就直接喺Facebook貼出社會福利署聘請本地照顧員嘅廣告，並附上佢個人聯絡方法，何指出廣告第二日就已經收過千查詢啦！

兩日接逾千個查詢

社署以月薪31,150港元聘請本地照顧員，合約期3個月。何呼籲網友轉介，名額招滿即止，仲附上自己個人WhatsApp連結作聯絡。何啟明接受查詢時就表示，都唔係第一次留自己嘅號碼，可以親自回覆更好，佢又指短短兩日就已經收到過千個查詢，但最後幾多人成功錄取就唔知啦！

至於有冇收到啲咩古怪查詢，何就話有唔少人都唔識開PDF申請表格，實在頭痛。喺網上公開自己手機號碼，又會否擔心收到騷擾電話？何指以前做區議員時都係咁做，話唔使咁緊張，通常未知來電都會飛走，所以唔擔心咁話。

但日前何嘅WhatsApp就因收得過多訊息出現故障，一度被禁用，要聯絡客戶服務先解決到問題，今次短時間內大批查詢，又會否出現故障呢？何笑言都只有做住先，冇計㗎，呢一刻暫時冇問題，唔擔保之後會唔會又故障啦。

第一手消息請下載on.cc東網 iPhone/ iPad/ Android/