昔日東方政情：老鴿聚在英 又有密偈傾
李永達夫婦去年落腳 留美單仲偕攜妻飛抵
民主黨（白鴿黨）元老單仲偕（(先)雞）因前年10‧1遊行而被控組織未經批准集結，被判入獄14個月、緩刑24個月。佢喺舊年辭去黨內職務後，靜靜雞離港去咗美國與家人團聚。事隔幾個月，最近佢更同太太專登飛去英國，為老友補祝生日添啊！話時話，因違法佔領行動（佔中）案被判入獄8個月、緩刑兩年嘅該黨副主席李永達（高達），舊年都同太太陳樹英前後腳離港赴英，唔知兩位老鴿會唔會趁機會喺英國聚頭呢？
話說自舊年9月就有消息傳出(先)雞已飛咗去美國，隔咗近3個月先喺Facebook（Fb）上更新在美近況，當時佢就喺美國加州太浩湖天堂山滑雪。之不過，由舊年12月更新Fb之後，離港起碼有半年嘅佢到依家都冇再發貼文或上載其他相片喇！
不過，(先)雞嘅朋友近日就喺Fb貼文，上傳咗(先)雞同太太為佢慶祝生日嘅合照，原來佢上月底就早已喺朋友Fb預告要飛去英國㗎啦！同一個貼文入面，見到佢嘅老友亦曾同分別喺舊年4月已抵英國嘅元朗前區議員杜嘉倫飯敍，同枱仲有喺舊年底赴英嘅前議員莫乃光。
離港赴美 單稱與家人團聚
至於點解佢會離港呢？舊年(先)雞任葵青區議會主席時，因被判刑，已喪失區議員職位，後來更已辭去白鴿黨司庫及選舉委員會副主席等黨務。佢之後因兩個兒子分別住喺美國東岸及西岸，喺疫情之下未能見面，所以就赴美同家人團聚。至於幾時返港，就仲未知喇！
在英泛民眾多 不時「攪局」
唔單止佢同高達等人離開咗香港，早前違反黨紀嘅該黨東區前區議員蘇逸恒，亦喺被革除黨席前，就已離港赴英，佢早前更喺Fb中透露自己已染疫。蘇曾公開批評高達「見人衝、自己鬆」，而加劇該黨內部矛盾。唔知佢哋有冇喺英國碰過面呢？依家有唔少泛民主派人士喺英國，周不時會有聚會，(先)雞今次喺英國，會趁機同邊個見面就拭目以待啦。
人人做記者
爆料方法 :
爆料熱線：
(852) 3600 3600
傳 真：
(852) 3600 8800
SMS：
(852) 6500 6500
