昔日東方政情：陳梓維話做生意 忽變買餸師
開配對公司 脫毒不易
去年區議會爆發離職潮，部分民主派前區議員已離港，至於留喺香港嘅人就另覓出路。其中，油尖旺前區議員陳梓維前日就宣布，自己最近開咗間名為「脫『毒』工程」嘅配對服務公司。由於主業務未正式開始，所以佢打算暫以「半義工」身份，協助疫情下難外出嘅獨居長者或雙老每日到街市購買新鮮餸菜，為期兩星期喎。
陳去年辭任區議員一職，任期至舊年7月。及後佢曾透露搵到新工作，但就好神秘，冇提及從事乜嘢行業。事隔逾半年，佢就終於宣布有新搞作，並喺公司嘅Facebook專頁上提到因疫情嚴重，好多獨居長者或雙老都非常害怕買餸時會感染，或者因未打針而去唔到街市、超市或商場，所以決定成立全新行業「買餸師」。
點解會諗到去幫人買餸？唔通係因為佢早前都「中招」，而喺染疫期間都落唔到街買嘢食，所以感同身受？之不過，呢項服務並唔係免費㗎，佢話會因應服務調整收費，如果單純買餸，40元以內嘅餸菜會收取10港元費用，80元以內嘅餸菜會收取20元費用。至於其他服務，包括去超市購物，或代拎嘢上樓就需額外報價喎。
佐敦獨居長者雙老優先
佢又話喺下周一就會投入服務，自己每日早上都會進行快速檢測，服務時間係早上9點至11點，只限佐敦區獨居長者或雙老優先，名額每日10個，並因應當天有冇義工協助而作出調整。至於喺尖沙咀嘅辦事處亦將會喺5月開張。之不過，就咁睇依家網上好似仲未有好大回響咁。
至於佢間公司叫「脫『毒』工程」，又話主要業務同配對服務有關，令人聯想起上月佢曾有感而發，喺回顧過去一年由區議員至辭職嘅心情之餘，仲大呻前任女朋友家人曾嫌棄佢收入少、難養活女方。當時佢更透露正籌備人生大事，唔知係咪就係開新公司呢？
人人做記者
爆料方法 :
爆料熱線：
(852) 3600 3600
傳 真：
(852) 3600 8800
SMS：
(852) 6500 6500
