政情：唔想鬱到病楊哲安一家齊夾Band

話說前日，楊哲安在社交平台上載咗一條夾Band片，片中楊哲安同太太楊張新悅及4個女兒，大多都着咗粉藍色嘅衫褲，非常襯色，算係有隊形。楊哲安負責打木箱鼓，太太就彈Ukulele（夏威夷小結他），女兒分別就唱歌同彈琴等。大家準備好，就由細女擊打三角鈴後，開始唱奏。

佢哋唱邊首歌？係二次創作嚟，改咗歌神SAM許冠傑嘅《同舟共濟》首歌嘅部分歌詞，例如人人害怕去搶菜搶茶、盡量自我檢疫、戰勝黑暗等。楊哲安話一家人正在留家抗疫，仲話多謝歌神畀機會佢二次創作添！見楊哲安一家夾Band咁開心，有網民留言話一家人充滿正能量，支持楊家合唱團。