昔日東方政情：專人家中飛髮 郭偉强畀囝囝詐型
新冠疫情不斷反覆，政府收緊社交距離措施，擴大受禁嘅表列處所範圍，當中包括髮型屋都要關閉。一直要去到4月20日先至有望開舖，仲有成個幾月，頭髮長了唔知點算好？議員郭偉强就唔同嘞，佢有專用嘅髮型師幫佢飛髮，但係就畀囝囝詐型喎。乜嘢事呢？
郭偉强尋日喺社交平台貼文，話有好多朋友問起，點解可以剪到頭髮，終於佢揭開謎底，仲上載咗張相添！相中見到佢坐喺中間位置，前方係囝囝，後面就係佢太太喺度全神貫注咁幫佢剪髮。
太太操刀 平時兒子特權
謎底原來就係佢賢內助操刀。東網打電話問佢剪頭髮係咪一向都係由太太包辦？佢話「梗係唔啦」！呢個特權，只有阿仔先可以享用，隨後又話太太好忙㗎，又要湊囝囝，所以自己平時會出街剪，由於疫情關係，冇辦法先要搵太太幫手，佢仲笑住話，阿仔見到仲話攞咗佢個「剪髮兜」嚟用添！
有網民留言話，太太做咗佢私人髮型師、賢內助十八般武藝，亦有網民話喺屋企可以開髮廊，仲話佢喺度晒幸福呀！
人人做記者
爆料方法 :
爆料熱線：
(852) 3600 3600
傳 真：
(852) 3600 8800
SMS：
(852) 6500 6500
