政情：單獨囚禁 伍健偉如置身淨土

伍健偉嘅社交平台尋日貼出佢嘅來信，話每日睇住各份報章嘅報道、文字同埋相片不斷散發着市民嘅難過、不安、迷惘或者驚慌失措。佢形容喺單獨囚禁嘅房間中，或許係天災人禍降下整片土地嘅一方淨土。不過，佢都承認單獨囚禁令佢感到孤獨，只可以默默地感受外界嘅情緒，又認為無力感係連結住大家嘅一道「失修木橋」，疫情下難免人人自危。

佢又喺信中提到，希望港人各師各法地協助周遭嘅其他香港人，優先協助、支援和照顧長者、小朋友及有需要人士，要抱住自救同埋互助嘅態度喎。

其實佢因為疫情已經冇得離開囚室一段日子，喺佢上個月中嘅信件就以豬嚟比喻自己，指二月初已經冇得再離開獨立囚室，話雖然以往被還押嘅日子大部分時間唔係食就係瞓，但都有得天天出去走動走動，但依家每日接觸到嘅人就得番監獄管理員咋！