政情：立會確診破百林素蔚再有職員中招

疫情嚴峻，立法會秘書處尋日再公布單日新增5宗同立法會相關嘅確診個案，由1月底起至今唔夠兩個月就已經累積105宗個案。其中，葛珮帆（EQ）同林素蔚嘅職員快速檢測結果為確診，幸好EQ同林進行快速檢測後確定無染疫。翻查資料，今次係林第二次有職員染疫，佢前日仲親自上樓做「派遞員」，向居民派發物資添！

葛珮帆快測冇染疫

秘書處向全體議員發電郵，指EQ嘅職員最近喺上月25日返回立法會綜合大樓6樓議員樓層。至於EQ自上月11日至今都無同該名受感染職員接觸，並每日進行快速檢測，結果均為無確診。而林嘅職員最近喺本月4日返回中信大廈15樓議員樓層，逗留約4個鐘，並曾到訪綜合大樓停車場，但無進入其他地方。林尋日朝早已進行快速檢測並無染疫。

因兩名職員分別曾接觸一名同事，所以秘書處已建議佢哋盡快接受檢測，並觀察身體狀況。但秘書處根據紀錄，發現本月4日約有10名議員及職員進出中信大廈15樓，秘書處建議佢哋盡快進行快速檢測。另秘書處亦有3名議會事務部、公共申訴辦事處和物業及保安組職員確診。秘書處已安排晚上喺立法會處所部分地方消毒。