政情：一星期行兩日山 肥老闆瘦身成功

肥老闆指，自去年12底離開立法會之後，今年1月開始做運動，但適逢疫情爆發，健身室冇得去，惟有相約朋友或妻子行山代替，強身健體之餘，又能放鬆身心，一舉兩得。佢坦言，最初半個月，行得相當辛苦，行一陣就氣喘吁吁，但笑言個人「愈行愈輕」，就開始輕鬆不少。現時一星期行2至3日，每次1至2小時，加上飲食方面都清減咗，自然減肥成功啦！

最近疫情嚴峻，肥老闆話幸好自己都安全，所居住的大廈以及屋企人都無事，只係有辦公室職員中招，自己冇得上北京開會，感到可惜，不過，最緊要都係身體健康，希望大家保重，注重飲食，飲多啲水，戰勝疫情。另外，佢又提到間中有與黨友、地產及建造界前議員石禮謙通吓電話，閒時相約見面飲茶，仲透露石禮謙最近愛上寫毛筆字呢！