政情:李卓人獄中染疫 蒙兆達在英康復
本地疫情大爆發,連懲教院所入面都出現多宗確診個案。日前就有消息指正在服刑嘅前職工盟秘書長李卓人都中招,估唔到其好拍檔、前職工盟總幹事蒙兆達原來早前喺英國都已中招,事隔6日再做快速檢測時就確認已經好番。
李卓人因前年8月18日及8月31日未經批准集結案,合共被判囚14個月。至於蒙兆達就喺去年9月,工會解散前已離港前赴英國。昔日拍檔分隔兩地,而原來喺傳出李囚中確診嘅前兩日,蒙都喺Fb貼文透露,指與大家同病相「連」,透露早前自己都中咗招,仲附上檢測結果相片。
蒙話屋企人冇中招
貼文下有唔少網民留言叫佢休息多啲,又問及家人有冇染疫,亦有人指蒙檢測結果嘅紅線好深色,話蒙病得都幾重。蒙就回覆指自己已經好番一段時間,至於老婆同囡囡都無事咁話。
人人做記者
爆料方法 :
爆料熱線:
(852) 3600 3600
傳 真:
(852) 3600 8800
SMS:
(852) 6500 6500