政情：全民檢測一味等 政界促即刻實行

有正喺北京出席兩會嘅政界人士指，香港推行全民檢測唔應該再等，更要配合「禁足令」去做。佢認為禁足可以9至14日作為起點，最多可延長至3個禮拜，又話如果3個禮拜就可以好大程度咁切斷社區傳播鏈嘅話，整個社會相對負擔得起呢個代價。強調香港應該要堅持「動態清零」，唔可以輕易放棄抗疫。

另外，佢話採取「躺平」、與病毒共存嘅政策，醫療體系一樣會被拖垮。佢覺得醫療體系用嚟保護市民，如果去做到一個地步要市民保護醫療體系，其實已經好悲哀。但如果能夠將疫情遏制於10%人口受感染，總好過把疫情放大至一半以上人口受到感染。至於醫院人手、病床及隔離設施等喺新一波疫情下供不應求，佢建議要臨時放寬規定，畀內地醫護到港工作。

商界議員都有類似諗法。議員邵家輝同樣認為全民檢測必須配合禁足令，否則市民繼續喺社區流動，就真係事倍功半。佢建議政府豁免部分人士同義工，讓該批人士可以確保市民生活所需，然後實施14日禁足令，斬斷社區傳播鏈。

佢話配合禁足令嘅全民檢測當然愈快愈好，商界對全民檢測已經等到心灰意冷，強調商界部分被勒令停業，而繼續營業嘅企業亦不斷有員工確診，搞到人手不足，但租金同人工都照樣要畀，都捱唔得幾耐喇！

對於禁足令，佢話有聲音指政府依家唔實行全民檢測，全因擔心確診人數太多而冇地方安置。佢就話，其實可以先禁足7日，等大部分輕症或無症狀患者先痊愈，重症患者就送去醫院，然後再進行檢測。但首先都要禁足，避免市民喺社區繼續流動咁話。