政情：梁敬國坐疫監 自嘲三等公民

我哋早前都講過，佢喺上個月到美國探望女兒後，打算回港時，因疫情嚴峻，港府採取熔斷機制，禁止美國同多國航班飛嚟香港，搞到佢要轉去泰國後，再返香港。

佢日前已返港隨即喺酒店隔離14日，佢尋日就喺Facebook上載咗幾張相，話自己回港前後已做咗多次PCR（病毒測試），已經成為PCR之王，又話喺隔離期間，餸菜一般，唔係餐餐都咁好食，生活就好似「三等公民」咁，等早餐、午餐同晚餐，不停喺度等食，又話啲腸粉唔夠熱，冇甜醬跟埋。

見到佢係咁呻，有網友就留言話自己要隔離21日，而佢隔離14天都抱怨，佢就話先前入境美國被困咗3星期，之後又喺泰國停咗20日，返嚟又要隔離，前前後後好長時間喇！勞工及福利局前局長蕭偉強亦有留言，仲話歡迎佢返嚟參加強制檢測喎。