政情：李浩然關注選舉籌款機制張宇人抵唔住頸教精新丁

新一屆特首選舉押後至5月初，但早前已有兩人表明參選意向，港府就話按現行法例如有人已公開表明參選，就需要就有關選舉開支作申報，並將籌款所得剩餘款項捐畀獲政府認可嘅慈善機構。之不過，議會「新丁」李浩然尋日就話擔心呢個機制會令有關候選人無能力再發起第二次籌款，因而無法參加5月嘅選舉，屬於最資深議員嘅飲食界張宇人忍唔住出聲，教呢個選舉新丁點樣避免情況發生。

做好預算分幾次收錢

李喺有關嘅小組委員會會議上話，原定選舉只係中止同延期，唔應該被視為另一次新嘅選舉，擔心有關候選人早前已就選舉經費籌款，喺5月選舉舉行前，無力再籌得另一筆款項，可能會帶嚟唔公義情況，令佢哋無法再參選。

雖然政制及內地事務局已回應有關安排係按法例進行，但李就認為呢個規定係有問題嘅。小組委員會主席張宇人喺指示下一位議員發言前，都忍唔住分享吓過去參選嘅心得。佢話「以後你做選舉，都穩陣啲，搵人捐款畀你都唔好一次過拎晒啲錢」，仲話咁就唔會擔心一次過取得全部捐款後，遇到類似情況，就要將其餘款項捐畀機構，之後無法再籌錢。

李聞言後笑指「呢啲情況無法預計」，但張就認為李係「新做選舉」，話自己咁多年參選，都會做好預算，即使搵到人支持，都要考慮以咩情況收取款項啊！