政情：李浩然關注選舉籌款機制 張宇人抵唔住頸 教精新丁

新一屆特首選舉押後至5月初，但早前已有兩人表明參選意向，港府就話按現行法例如有人已公開表明參選，就需要就有關選舉開支作申報，並將籌款所得剩餘款項捐畀獲政府認可嘅慈善機構。之不過，議會「新丁」李浩然尋日就話擔心呢個機制會令有關候選人無能力再發起第二次籌款，因而無法參加5月嘅選舉，屬於最資深議員嘅飲食界張宇人忍唔住出聲，教呢個選舉新丁點樣避免情況發生。