政情：確診張培剛煲中藥 跌爛煲蓋

張培剛貼文話喺上月23日快速測試時呈兩條紅線，顯示已確診，跟住開始喉嚨痛、咳嗽同有痰，仲有發冷低燒，而喺確診第二日後，陸續收到好多朋友送嚟中藥，同埋介紹中醫師幫佢網上診症，兼且送埋中藥同膠囊上門畀佢，咁都不特止，有朋友知道佢屋企確診人數多，唔夠藥煲用，專程買咗個電子藥煲畀佢。

佢其後再貼文話中招後6日，測試顯示仍然係確診，仲有少少沙聲，但精神狀態非常好，又話呢幾日已學識煲中藥，短短幾日已經煲咗17次中藥，有用明火同電子煲嘅，只係第一次煲藥時唔小心跌爛咗個煲蓋之外，隨後一切都非常順利，又話女兒康復情況畀自己更快。有網民更留言，叫佢公開分享藥方幫吓其他患者咁話。至於區議員辦事處，佢話為安全起見，喺上月23日已經暫停對外開放兩星期。