政情：鬼祟抵台 鄧小樺：保外就醫

鄧話今次離開香港，對佢嚟講算係「保外就醫」，期間提到由於去年太辛苦，最後3個月不停睇醫生幾乎床頭金盡，所以只係想休息一下。希望喺台灣能有些空間讀書、創作、做有意義嘅事，幫到其他人，亦都照顧到自己。

離開香港終有不捨，佢話最掛心嘅都係文學館，而每周都要處理文學館工作，一關一關咁過，強調佢哋團隊唔會輕易被打敗。佢又話走時朋友都同佢講「快點回來」，而台灣嘅朋友比較多講「歡迎來台」，至於自己講得最多就係「祝平安」。佢希望在港朋友平安，喺每一個愚昧舉措前吊臂掉頭而去，相信自己同本來香港嘅智慧，喺面對毫無意義嘅磨難下，仲可以搵到自己嘅意義。

鄧小樺曾為香港電台節目《五夜講場》主持，不過去年喺廣播處處長李百全上任後，該節目曾一度被要求短暫停止製作。但至去年6月鄧再收到港台通知，該節目再度被叫停製作。喺2019年理大衝突事件中，鄧曾進入理大校園，離開時被捕，當時文學館發聲明指鄧係以作家身份進入理大校園，希望可在場觀察及見證反修例抗爭以嚟最嚴重嘅警民衝突。到2020年元旦，警方喺旺角發射催淚彈，驅散示威者，鄧貼文話佢倒數後，喺行人路上被催淚彈射中，左眼角受傷且流血。