鄒家成無得放風 稱肌肉有啲鬆

鄒家成喺社交平台貼文話自己狀態都幾好，但喺一開頭隔離21日到依家「釘倉」，即獨立囚禁，基本上無機會離開囚倉到室外地方做運動，所以條腰、啲肌肉有啲壞壞哋，但其他所有嘢都OK，希望朋友同家人唔使太擔心，亦都祝福眾人平平安安、身體健康。

其實佢喺舊年6月獲准保釋，12月底以「湊夠學分」嘅形式，喺都會大學「通識學士學位」畢業，仲參加咗大學畢業禮，坦言「原來沙紙真的來得不易。」但喺今年1月中旬到警署報到時再被警方國安處拘捕，指佢涉嫌違反法庭保釋條件，喺保釋期間發表有合理理由被視為危害國家安全嘅言論同行為，其後法庭撤銷其保釋，下令將佢還押懲教署看管。