昔日東方陳沛然式走佬袋 未入營荷包清零
涵蓋衣食住行 網民嘲似走難
第5波疫情爆疫不斷，確診人數急升，唔少患者同密切接觸者需入營隔離，惟時間倉促，部分人都未能及時準備物資，頓時不知所措。話自己係足球員，興趣係做醫生嘅前醫學界議員陳沛然（Pierre），最近就推出「隔離」頻道，不但為市民報道每日疫情嘅新聞，亦都會對時事作出評論，近日更提供隔離物資「懶人包」，涵蓋衣、食、住、行四方面，仲指係時候做一啲準備。有網民就留言依家去入營隔離似足走難，亦都無人想提前做呢個準備，笑言荷包會「大出血」。
Pierre日前喺網上分享咗呢個「懶人包」，仲話要先天下之憂而憂，當中包括四大方面。其中喺「衣」方面，包括內衣褲、睡衣褲及禦寒衣服等。
至於喺「食」方面，由於隔離營所提供嘅嘢食有限，所以Pierre都建議買定罐頭，即沖湯包等等，亦都可以準備埋保溫杯、密實袋同零食乾糧等；而「住」方面就需要準備洗面毛巾、沖涼毛巾同女性用品等等。最後喺「行」方面，為咗可以繼續同外界聯絡，Pierre都建議要帶定數據儲值卡、手提電腦、充電線同耳機等等。
市民：寧願居家隔離
有網民睇完Pierre嘅建議，都好多謝佢畀咗個清晰指引，但就比較傷感咁留言，話「相信冇人想做這準備，但殺到埋身冇辦法」，更指依家去隔離慘過走難，亦都有當年生B要執走佬袋嘅感覺。有網民甚至批評政府現時準備嘅隔離房間將來肯定不足，唔明白仲需要入營隔離嘅道理，寧願居家隔離咁話喎！亦有網民嘲諷政府做嘢又亂又慢，話等政府嚟送佢哋去隔離嘅時候，都已經好番喇！更有網民笑言相信就快可以清零，不過就係個荷包呀！
呢波疫情影響廣泛，早前亦影響內地蔬菜供應，導致香港菜價飆升，唔少市民都買多咗糧食，而市面亦有搶購物資情況。所以Pierre亦緊貼時事，早前化身做住家男人，分開幾日去唔同嘅街市格價，仲開設咗一份試算表（Excel），定期更新各種蔬菜嘅價格，希望格價畀市民參考吓，免得市民白行一趟，同時盡量買到心頭好。
人人做記者
爆料方法 :
爆料熱線：
(852) 3600 3600
傳 真：
(852) 3600 8800
SMS：
(852) 6500 6500
