政情：染疫一波三折 陳志豪呻虎年苦

農曆新年前，Victor因為家庭原因而前往歐洲，其後喺本月初染疫。佢話確診之後都冇乜病徵，只係攰少少。但後來佢嘅檢測結果呈康復後，跟住就出現支氣管炎同埋咽喉炎嘅症狀，喉嚨劇痛，仲係咁咳添。

由於Victor嘅到訪地被港府列為禁飛嘅國家，只好先轉飛到一個東南亞國家隔離14日，之後先再回港。儘管喺彼邦嘅隔離日子即將完結，3月初就會飛返香港。之不過，佢先前預訂嘅隔離酒店因臨時畀港府用作抗疫酒店，於是要改訂另一間酒店，真係一房難求啊。Victor話本命年一開局就真係苦，惟有希望虎年可以苦盡甘來，先苦後甜咁啦。

至於生肖屬鼠嘅議員梁文廣，儘管今年並非「犯太歲」，但健康方面就唔係幾好彩嘞，事關佢前日接受鼻咽拭子採樣檢測，尋日就收到檢測結果為初步確診。佢話會繼續與同住家人居家隔離。

此外，財政司司長官邸一名傭工尋日初步確診，雖然財政司司長陳茂波及其家人嘅拭子採樣檢測結果為無染疫，兼且並非有關傭工嘅密切接觸者，但為審慎起見，陳會在家工作5天，由最後接觸陽性個案嘅日期起計，直至本月27日。機電工程署署長彭耀雄嘅兒子，其深喉唾液樣本化驗結果為初步確診，但尋日彭耀雄快速測試結果為無染疫，其深喉唾液樣本化驗結果同樣未有驗出病毒。