政情：林琳搞錯議題亂提問場面尷尬

話說會議上，議員林琳發言時提出3個問題，包括問及政府為公務員提供乜嘢培訓，如何配合智慧政府提升公共效能、財政預算案預留6億元進行全面電子政府審計會否分階段檢視、將成立嘅「數字化經濟發展委員會」有冇開支細項等。

出席會議嘅勞工及福利局副局長何啟明聽到提問後當堂呆咗，回應指「我諗今日係審理關於綜援金額，議員提問預算案款項同埋部門計劃等，呢一刻就冇資料，可能特別財委會相關同事答就會清楚啲」。

財委會主席陳健波亦都話「今日就傾綜援嗰啲問題嘅……」講到一半，林琳就好快咁話「OK知道！」陳就話「不如跟返呢個（綜援）問啦好冇呀？」之不過，林琳亦進入無言狀態，霎時間會議鴉雀無聲。陳見狀就打圓場，話「如果你冇問題，就之後再安排喇好嘛？」隨即安排下一位議員發問。

另外，議員黃元山發言時就明言要「借題發揮一下」，講及安老院舍物資不足問題。陳健波回應話，明白議員關心疫情，但亦希望大家明白時間有限。又呼籲其他議員唔好倣效黃嘅做法，切勿借題發揮喎。