政情：快測揭初確 劉桂容居家隔離

劉桂容接受本報訪問時表示，過去幾日可能因天氣轉涼兼落雨，身體感覺有啲攰，抵抗力差咗，尋日如常喺屋企進行快速檢測時，顯示結果呈染疫。佢話已第一時間遞交深喉唾液樣本作核實，依家就覺得有啲腰酸骨痛，喉嚨有啲乾，已定時服藥。暫時雖冇大礙，但為安全起見，自己已搬到仔仔房間自我隔離，而仔仔就同爸爸暫時共用一間房，至於同住家人經初步快速測試，顯示未有感染。

劉又話自兩星期前開始，每日都有做快速測試，幸好今次發現得早，應該未有波及到身邊同事及家人，至於自己屋企及工作地方已進行徹底消毒同清潔，而工作上有接觸嘅同事亦已進行檢測，佢哋暫時未有感染。