政情：枕邊人確診 聶德權坐14日疫監

聶德權嘅太太尋日朝早進行快速測試，初步結果為染疫，而佢嘅深喉唾液樣本化驗亦得出同樣結果，現正按衞生署衞生防護中心指引，喺屋企等候送院或去隔離設施。聶德權同家人亦都做咗快速測試，結果冇染疫，而佢嘅深喉唾液樣本化驗結果冇帶病毒。

衞生防護中心經評估後，將聶同其餘家人列為密切接觸者，佢哋要按「居安抗疫」計劃，喺屋企進行14天家居檢疫，期間須按該計劃嘅要求進行醫學監測，包括喺指定日子進行檢測。而喺檢疫期間，聶會在家工作。

身兼環境保護署署長嘅環境局常任秘書長謝小華，其司機尋日初步確診染疫，但謝小華經快速檢測就未驗出病毒，然而為咗審慎起見，謝小華會在家工作，直至深喉唾液樣本有化驗結果。而該名司機毋須與公眾人士接觸，加上沒有外遊紀錄，工作時有戴口罩及遵守防疫措施。

另外，尋日立法會一日內有6人確診，當中包括3名秘書處職員以及一名傳媒工作人員、以及郭玲麗議辦職員、陸頌雄議辦職員共兩人。其中郭玲麗進行快速抗原檢測結果呈陰性，但會暫時自我隔離。

至於3名秘書處染疫職員則分別隸屬議會事務部、物業及保安組和文件收發分組。而新城電台一名工程人員前日到立法會綜合大樓115s室工作，同日晚上進行快速抗原檢測，結果確診。