昔日東方政情：家傭染疫 打熱線被回應「幫你唔到」 醫療崩潰 沈運龍嘆港人只能自救
第5波疫情大爆發，確診數字屢創新高，近日更有多宗外籍家傭中招嘅個案。香港品牌發展局副主席沈運龍，佢屋企嘅工人姐姐喺上周初染疫，作為僱主嘅佢雖立即致電相關部門求助，然而打上百次電話都冇人接聽；到後來有人接聽電話，對方竟然話「依家幫你唔到」，建議佢下周再次來電。結果延宕多日工人姐姐仍未送院，至尋日（23日）做快速檢測已告痊愈。佢慨嘆香港嘅醫療系統已經崩潰，市民一旦確診，恐怕只能自救。
沈運龍話上周初，工人姐姐感到喉嚨痛，做咗兩次快速檢測皆顯示中招，於是致電政府部門求助，但佢話打足上百次電話都冇人接聽。當後來有人接聽，對方就明言唔會為中招嘅工人姐姐進行登記，而就算下周打得通電話，都要等人送樽仔上門，若檢測結果係染疫的話，要再檢驗多一次，仲等5至7日先至會有檢測報告，即是話前後需時10多日。沈運龍當下就質疑，仲需要隔離14天嗎？
沈運龍都擔心自己會染疫，但上網預約做檢測，排期最快都要5日後，於是改為購買快速檢測包，為自己及公司員工做檢測，結果有一位職員染疫。同時安排工人姐姐入住家中一個附設獨立洗手間嘅房間自我隔離，然後由佢太太負責送上一日三餐。而去到尋日，工人姐姐做快速檢測就得出痊愈嘅結果。
居家隔離至痊愈 當局都未有登記
由於工人姐姐由染疫至痊愈，政府都未有登記；加上檢測人手同檢測量嚴重不足，因此沈運龍相信真實嘅中招人數，應較政府公布嘅數字為高。佢又話僱用外傭嘅家庭相當普遍，但居住環境多數較為狹小，若果一人染疫，按照目前政府嘅處理程序，好大機會會惹全家。
人人做記者
爆料方法 :
爆料熱線：
(852) 3600 3600
傳 真：
(852) 3600 8800
SMS：
(852) 6500 6500
