港爆疫 馮家強叫移英港人收起嘲笑

馮家強話喺舊年呢段時間，深受疫情所困嘅英國以至歐洲都係一片哀嚎，英國不但實施較香港現時更嚴格嘅防疫措施，且醫院爆滿，緊急改建各大型會議中心以收容染疫病人，但當地依然有好多人中招，甚至失去親友。之不過，今日有好多移英港人，都未曾經歷英國抗疫最艱難嘅日子，以為英國就係咁「美好」。佢話難聽啲咁講，其實係享受他人所種嘅成果，然後沾沾自喜。

跟住佢又話，雖然英國即將全面解除防疫限制，但此舉亦惹來好大爭議。況且傳媒揭發首相府於封城期間仍搞party嘅醜聞，唔少人都異常憤怒，要求首相約翰遜下台。而香港目前嘅第5波疫情，只係經歷英國同歐洲過去兩年嘅疫情階段。佢話曾經挖苦香港抗疫現況嘅移英港人，儘管好幸運咁避開咗英國嘅封城，又避開香港疫情大爆發，但願佢哋收起嘲笑，集中力量關懷仍在香港嘅朋友咁話。