同坐一室立會職員確診邵家輝唔擔心

立法會職員近期確診個案急升，繼主席梁君彥嘅司機、同埋議員楊永杰嘅兩名議辦職員「中招」後，立法會秘書處尋日證實再有3人確診，包括兩名議會事務部職員、以及一名外判電視製作承辦商嘅員工。兩名染疫嘅議會事務部職員曾經協助議員喺會議室內主持遙距會議，當中牽涉邵家輝、吳永嘉及易志明三位議員。身兼工商事務委員會主席嘅邵家輝話唔認識確診職員，自己過去3日都有做快速檢測但顯示冇染疫，亦都冇病徵，唔使隔離喎。

因應疫情肆虐，立法會近期改由遙距方式舉行會議，但變種病毒仍防不勝防。立法會秘書處尋日表示，接獲兩名議會事務部職員通知，指佢哋分別經核酸檢測同快速抗原檢測後皆呈確診結果，而兩人最近一次上班，分別為本月11、同本月15日；工作地點為2樓嘅會議室2同4，以及2樓同3樓嘅職員辦事處，兩人喺工作期間均全程佩戴口罩。至於初步確診嘅外判電視製作承辦商員工，最近一次上班日期亦都係本月11日，工作地點係3樓嘅電視工作室。秘書處指呢位外判員工於工作期間，全程有戴口罩，並無接觸議員或公眾人士。

主持會議座位相隔約8呎

議員邵家輝就喺2月11日主持工商事務委員會，當時佢就戴咗兩個口罩，而會議則長達約兩個小時。邵家輝回覆話，唔認識確診職員，同對方嘅座位距離約有8呎，加上距今已11日，都無出現病徵，過去3日都有做快速檢測證實無事，所以唔會太擔心，亦都唔使自我隔離喎。

吳永嘉易志明亦牽涉其中

另外，議員吳永嘉喺2月14日主持經濟發展事務委員會，3日後出席2021年施政報告致謝議案辯論，當時睇落精神奕奕，氣色唔錯。至於議員易志明就喺2月15日主持交通事務委員會，當時亦有戴上口罩，其後落區參與「抗疫巴士」消毒活動，估計都無咩大礙。

而立法會秘書處尋日再宣布，為減少人群聚集及感染風險，立法會行政管理委員會已同意，由即日起，暫時關閉綜合大樓停車場的司機休息室，直至另行通知。期間秘書處會對該休息室進行深層清潔及消毒同若干小型工程。