政情：同事中招 楊永杰與孕妻分房瞓

佢透露，喺土瓜灣嘅地區辦事處同中信大廈辦公室各有一名女同事，使用快速測試後結果初步確診，佢哋喺上星期已經在家工作，冇返工。由於佢喺2月17日同嗰名同事曾有短暫接觸，所以佢同其他同事都已經做咗快速測試，並冇確診。至於地區辦事處喺上星期亦已全面消毒，而立法會秘書處會安排清潔公司消毒中信大廈13樓辦公室。

依家喺屋企房間自我隔離嘅佢，長期戴上口罩，亦同太太分房。幸好懷有身孕嘅太太快速檢測結果都係冇確診。為安全起見，佢今日會去做核酸檢測，又話如無意外，今個星期四可以回復正常工作。

另外，立法會秘書處前晚發電郵通知全體議員，話晚上接獲中信大廈管理處通知，大廈一名負責晚上公共地方清潔工作嘅外判清潔工初步確診，而佢最近嘅上班日期係上周五，但該名員工所屬嘅外判清潔公司，並唔係立法會綜合大樓嘅外判清潔承辦商。