政情：港專家抗疫語出驚人盧寵茂：與毒共存落黃泉

袁國勇：唔去打針要過身

港大專家袁國勇早前有驚人之語，促港府限定3月前全民接種疫苗，博一博暑假全面開放通關，但佢預料會令感染及死亡人數大幅上升，仲話唔打針嘅人會遭受「物競天擇」、「你是要過身」，引起爭議。新冠肺炎確診數字近日喺本港幾何級數上升，社會上不時有人提出應該與病毒共存。香港大學深圳醫院院長盧寵茂就話香港應該繼續堅持動態清零政策，指與病毒共存嘅政策只係歐美國家無力抗疫嘅藉口，更形容等於送病人去「黃泉」咁話喎。

盧寵茂尋日出席一個有關防疫抗疫嘅網上論壇，話自己過去喺深圳工作時，經歷同埋學習到內地如何動態清零，希望大家明白動態清零係香港嘅目標。佢話因為採取與病毒共存嘅國家嘅死亡率，比採取動態清零嘅中國多好多，認為病毒係無可能共存嘅，反而只會送病人去黃泉啊，佢又批評與病毒共存只係歐美國家無力抗疫嘅藉口囉！

依家本港公立醫院爆煲，佢話雖然現時本港醫療系統難以容納所有患者，但認為一定有其他嘅措施，例如方艙醫院，甚至封區等，佢話都唔係完全無可能㗎。佢話有唔少市民居住環境擠迫，所以建議應該將輕症患者搬到隔離設施，唔單止係方艙醫院，仲可以選用社區會堂同學校禮堂等，避免確診者喺社區擴散。

倡屋企躺平為抗疫出力

講到封城同埋防疫政策，都會令人生活大不方便，但佢之前亦曾要連續10幾日留喺深圳嘅辦公室隔離，期間都只係食飯盒咋。被問到會唔會覺得失去自由，佢就咁講，雖然自己嘅自由受到限制，但就保障咗大部分人嘅自由同埋健康咁話喎。佢又話近來出現潮語「躺平」，嚟形容咩都唔做，淨係攤喺度，佢話當然唔係要政府抗疫上躺平啦，但其實只要市民可以喺屋企躺平，忍一忍，避免出外，即使咁微小嘅事情，都已經為抗疫出咗一分力喇！

喺經濟方面，同場嘅香港大學首席副校長王于漸就話疫情嚴重影響全球供應鏈，但對香港而言就唔係物資上嘅供應喎，而係高端人才嘅供應會短缺，若果疫情繼續蔓延，恐怕會造成更大影響啊。佢建議企業喺經濟低迷時最好多啲學習，增強經濟恢復後嘅競爭力，例如傳統產業要轉型改變。