政情：鄧飛參選壓力大鬼剃頭 開會蝦碌撳錯按鈕

鄧飛喺節目中被問到點解會參選立法會時，就話經過2019年社會事件，發現唔少中學生參與其中，當時事件對中學教師及校長而言都好大壓力，但當時亦因而萌生參選念頭。喺選舉制度改變後，因佢認識更多社會人士，故教聯會調整策略後，佢由教育界轉去循選委會界別出選。不過佢就直言當時壓力好大，喺去年11月時更出現「鬼剃頭」，後尾枕出現小範圍嘅脫髮。佢又話依家仲適應緊立法會嘅工作，直言每日電郵文件都比較多，平時都要多睇文件而唔可以「齋吹（水）」。

講講立法會開會，原來都有唔少搞笑嘢，佢話喺首次會議、即答問大會上，議員謝偉俊提出規程問題時，佢就見到枱上螢幕上有「規程問題」按鈕，所以多手按下，點知立法會主席梁君彥同秘書長陳維安即刻望住佢，仲「傳紙仔」詢問有何問題。他自言當時手足無措，惟有夾硬解釋話會議進行一個鐘只有3名議員發言，希望可以延長會議時間。

喺教育界多年嘅鄧飛被問到對過去多次社會事件嘅睇法，其中喺2012年反國民教育事件中，佢當時任開展德育及國民教育科委員會委員，坦言當時喺政府總部開會，眼見地下有不少學生及人士聚集都曾擔心未能離開大樓。佢又大爆政府擱置推行國民教育科嘅「秘聞」，話當時有委員會成員建議由委員會一致通過擱置決定，再畀港府考慮。但佢認為自己作為教聯會代表，如投票支持擱置國民教育科，以後教聯會就難再自稱為愛國團體，強調好大件事，故當時就簽下棄權嘅文件。

講到育兒心得時，佢就強調一直希望9歲嘅囡囡可拓寬眼界，故喺工作時都會帶埋佢去電台及電視台見識一下。其中佢更會帶囡囡落酒吧感受氣氛，仲話當囡囡長大後要搵男朋友，青春期有好多想法時，可站喺男性角度同佢分享經驗喎！