政情：非同住家人快速檢測初確 麥美娟即時自我居家隔離

麥美娟並無交代該位非同住家人同佢嘅關係，只係強調該名家人已經打咗3針，無病徵。尋日雖有短暫接觸，但不涉家庭聚會。雖然麥美娟隨後所進行嘅快速檢測得出無中招嘅結果，但佢同該名家人嘅深喉唾液樣本樽將於今日送去衞生署並等待檢測結果，期間佢會遵守自我隔離指引，足不出戶。若有其他進一步消息，會適時公布咁話。

佢又重申，過去幾日都有進行快速檢測，每次都顯示無染疫。而過去一周，因會議改由遙距視像形式進行，所以佢未曾踏足立法會大樓。

另外，東區區議員梁詠詩嘅夫婿亦初步確診，加上屋企嘅家務助理都有喉嚨痛病徵，為穩陣起見，其辦公室助理都要自我隔離，故位於筲箕灣中心嘅辦公室即日起亦暫停運作，直至另行通知。