政情：風暴下返工報到在英劉珈汶整雪糕

香港打工仔一旦遇上8號風球，通常可享受「打風假」嘅另類福利。去年移居英國嘅黃大仙前區議員劉珈汶，近日佢喺倫敦遇上當地30年來最猛烈嘅風暴，感覺上仲厲害過香港嘅10號風球。雖然有同事因火車停駛而返唔到工，但係佢就要冒住惡劣嘅天氣上班當值。

貼文話30年一遇

劉珈汶前日喺社交專頁貼文，話倫敦連續遭受風暴Dudley同Eunice嘅吹襲，而後者更係英國30年一遇嘅大風暴，呢幾晚喺倫敦仲愈刮愈大風，只要置身喺當風嘅大街就會感到寸步難行，留喺安全嘅地方當然好啦，之不過仍然要返工囉。講到呢度，原來劉珈汶舊年喺皇家郵政嘅臨時工已告一段落，而由佢上載一幅「雞蛋仔雪糕」嘅照片，同埋話要去沖珍珠奶茶，睇嚟佢依家從事餐飲業，而老闆仲係香港人添。

佢喺貼文又提到，以往更寒冷嘅日子當地人都鍾情嗌凍飲，但近日明顯多咗好多人要熱飲，由此可見今次嘅風暴威力，不容小覷。