政情：港府扶貧目標空洞 近半老人長年捱窮

議員管浩鳴指，儘管着手縮減貧富懸殊同扶貧喺政府工作重點之一，但成效方面就令人詬病，指就算有長者生活津貼，但長者貧窮情況仍十分嚴重。管話全港長者約130萬，其中45%屬貧窮人口，政策介入後仍有14.5%，直言數字十分驚人。管批評政府甚少有扶貧目標，其實應定期調整，否則難有路線圖同時間表。

議員鄧家彪指若目前採用嘅貧窮指標只能作參考，而不能作行政及管治目標嘅話，只係「嘥大家時間同期望」。鄧建議盡快制訂可行嘅減貧目標，特別要處理老年人嘅基本生活需要同埋在職貧窮嘅問題。

議員狄志遠則堅決反對政府向弱勢社群開刀，不滿4月開始向社福機構削減1%嘅整體資助，金額牽涉約兩億元。狄指此舉對社福機構影響深遠，被削減嘅金額等於530個新入職大學畢業生嘅薪酬。狄指政府喺施政報告描劃好多政策，但唔係「做咗嘢就代表做得好」，反而係要了解社會需求。

議員江玉歡指疫情下單親家庭嚴重受影響，當經濟支柱失業，整個家庭運轉將走向困境，有研究亦指四成單親家庭生活喺貧窮線下。然而，施政報告卻隻字未提單親家庭嘅生活狀況，江建議政府應給予單親家庭更多關注，包括一定嘅財政支援，建設社區照顧兒童設施等。

議員陸頌雄則指香港智慧城市發展緩慢，批評「智方便」設計急就章、後台支援不足，早前大批巿民使用「智方便」登記電子消費券導致「大塞車」。陸形容「智方便」令人感覺係敷衍市民同議會嘅手段，其功能沒有整合，難怪市民寧願選擇沿用傳統方法。陸指政府嘅智慧城市應用程式欠缺一站式處理，每一次市民都要再次輸入個人資料，敦促政府須繼續改善。