昔日東方政情：邱達根批北部都會區 欠詳細規劃
現屆政府去年發表最後一份《施政報告》，提出北部都會區發展策略，目標唔單止發展創科產業、提供就業機會，仲可以與一河之隔嘅深圳接軌。之不過，呢個策略由公布至今都未有細節規劃同時間表。喺尋日嘅立法會會議上，有議員批評政府目前嘅科技發展藍圖已經係20多年前嘅產物，多年嚟都無作新嘅勾畫，質疑北部都會區係咪具備政策吸引人才同企業。
立法會尋日繼續進行2021施政報告辯論，喺辯論經濟發展環節上，科技創新界議員邱達根就批評政府勾畫科技發展藍圖已經係20多年前嘅產物，政府需要新嘅發展藍圖，先會有更清晰嘅方向發展創新科技，並提升香港創科嘅國際地位同對國家嘅重要性。邱又話北部都會區缺乏詳細規劃藍圖，質疑喺資金、土地、政策上有否能力吸引人才。
議員洪雯亦認為，政府應盡快制訂北部都會區嘅產業發展規劃，提供中層同基層就業職位。洪認為《施政報告》未有提及有關產業規劃，擔心新發展區會變成只有人住但無人就業，或只有人工作，晚上卻冇任何生活嘅社區。
倡參考內地發展項目
議員陳紹雄亦批評北部都會區欠短中期規劃，例如幾時起樓及相關發展模式仲未有定案，令社會難聚焦討論，建議政府參考內地發展規劃做法，為北部都會區發展定下5年計劃，令工作「成熟一項推一項」。
工程延期完成亦係阻礙發展嘅原因之一。商界議員廖長江指香港鐵路工程動輒耗時10多年，工程超支延誤屢見不鮮，香港北環綫支線延伸工作仍未動工，相反深圳嘅基建工程興建速度快，可見兩地發展步伐喺現實上有唔少落差，強調雙城合作不可只當口號，政府必須盡快改革行政機制及工作流程，精簡法定程序至可跟上內地步伐，共同發展。
人人做記者
爆料方法 :
爆料熱線：
(852) 3600 3600
傳 真：
(852) 3600 8800
SMS：
(852) 6500 6500
