政情：政策一日改3次 議員質問如何管治

議員張國鈞批評政府政策解說，以及同市民溝通嘅能力嚴重不足。張以國家足球隊做比喻，即使有好嘅人腳同埋資源，但每次出嚟比賽，結果都令人失望。張批評政府抗疫資訊兩年嚟都無進步過，資訊慢得嚟仲要難以理解，制訂政策時又未經深思熟慮，更可能喺24小時內更改3次，市民無所適從，不利特區政府嘅威信。張又批評政府部門各自為政，近日實施居家隔離嘅新政策時，衞生署叫市民留喺屋企，但其他部門就無向相關市民提供協助喎。

議員陳克勤提到應改革公務員制度，佢話自己過往同公務員接觸多年，發現部分公務員主動解決問題嘅意識不足。陳以街上有樹木快將倒塌為例，公務員往往唔係急於處理樹木嘅危機，而係先界定樹木屬於邊個部門負責。陳又指粉嶺北有地皮空置廿幾年，質疑公務員淨係識得跟程序做嘢，但就無靈活解決問題同埋壓縮程序嘅意識囉。

唔單止工作能力備受評級，好多公務員及其家屬都擁有外國國籍，涉及雙重效忠嘅問題。另一個議員黃國舉例指，理應考慮取消首長級官員嘅雙重國籍，又指公務員對國家觀念同政策認識不足，促政府提倡以及加強一國嘅觀念。

本身係律師嘅議員陳曼琪都指出，喺公務員同埋公職人員方面，《港區國安法》第6條所提及嘅公職人員定義範圍需要擴大，政府所有諮詢委員會非官方成員同埋律政司外判檢控官、法援處同當值律師服務嘅外判大律師和事務律師，委任前需宣誓效忠，重要公職位置人員嘅就職或就任資格，就要提升至不能擁有雙重國籍。另一方面，陳又認為應加快本地法律去殖民化嘅過程，現有法例仍殘留「女皇陛下」、「聯合王國」、「英國屬地」等嘅殖民地字眼，必須要刪除咁話喎。