政情：家長難禁子女打機 鄧飛教約法三章

從事教育嘅鄧飛話小朋友打機未必一定係壞事，況且曾幾何時，佢自己都好鍾意打機啊！佢話喺打機過程中既可訓練反應，亦可從中學識一啲英文，而佢亦觀察到有啲學生之所以打機，其實係想做電競選手或藉此賺取收入。

之但係，任何事亦唔可以過分沉迷，若果無止境咁打落去，既會耽誤其他應做嘅事，對視力亦會構成不良影響。

其實家長都好難監察仔女用手機，而佢任教嘅學校所採取嘅做法，就係要求學生上課前須交出手機並存放喺校務處，若果家長喺上課期間要聯絡仔女，只要致電校務處就得嘞！喺家庭方面，佢就建議家長不妨同仔女約法三章，譬如做功課一個鐘，先至可以玩手機半個鐘。佢又重申，要完全禁止子女上網係好難辦得到嘅事。再者，小朋友若欠缺上網嘅技能，對將來嘅生活同社交都會帶來問題。