昔日東方霍啟剛蝦碌 連續叫錯議員名
新冠疫情持續兩年幾，唔少工作或者活動都改為網上進行，但始終唔係面對面，可能會搞出蝦碌事件都唔定喎。立法會民政事務委員會尋日召開會議，但委員會主席鄭泳舜因為有黨友染疫，要留家工作，未能到立法會主持會議，惟有改由副主席霍啟剛主持，點知佢就蝦碌，頻頻叫錯議員個名，仲要係兩次啊！
話說尋日係霍啟剛第一次主持立法會事務委員會嘅會議，不過因為疫情關係，各議員分別以網上視像會議形式開會。
話屏幕細睇唔清楚
開會初期佢點名議員發言時，就叫錯咗議員陳凱欣做陳穎欣，兩位議員來自唔同界別，網上會議嘅背景顏色都唔同喎，唔知霍係咪因為太緊張呢？陳凱欣發言時都有特別提醒霍，話自己係陳凱欣，叫霍要搞清楚唔好再叫錯喇！而霍都解釋，因為會議議員人數多、屏幕細睇得唔係好清楚，所以先會叫錯。
點知話口未完，霍就再叫錯第二次人名。其後到議員陸瀚民請求發言，霍就叫錯佢做另一位同樣姓陸嘅議員陸頌雄，之後可能發現失誤，就即刻改口，但都係叫錯，將陸瀚民叫為陸頌文，最後先講番啱啊！
人人做記者
爆料方法 :
爆料熱線：
(852) 3600 3600
傳 真：
(852) 3600 8800
SMS：
(852) 6500 6500
